Eze 19 | KikGKY | STEP | “Ningĩ ambĩrĩria macakaya makoniĩ athamaki a Isiraeli,

Ezekiel 19

Macakaya nĩ ũndũ wa Athamaki a Isiraeli

1 “Ningĩ ambĩrĩria macakaya ^{▼▼Icakaya rĩĩrĩ rĩatungagwo na rĩkainwo hĩndĩ ya mathiko ma mũtongoria (2Sam 1:17-27).} makoniĩ athamaki a Isiraeli, 2 ^bũmeere atĩrĩ:

“ ‘Atĩrĩrĩ, maitũguo ahaanaga ta mũrũũthi wa mũgoma
arĩ gatagatĩ ka mĩrũũthi ĩrĩa ĩngĩ!
Wakomire kĩmamo-inĩ kĩa mĩrũũthi mĩĩthĩ,
na ũkĩrera ciana ciaguo.
3 Warerire kĩana kĩmwe kĩaguo,
gĩgĩtuĩka mũrũũthi ũrĩ hinya.
Mũrũũthi ũcio ũkĩmenyera gũtambuuranga kĩrĩa wanyiita,
na ũkarĩĩaga andũ.
4 ^cNacio ndũrĩrĩ ikĩigua ũhoro waguo,
naguo ũkĩgwatĩrio irima-inĩ rĩao.
Ũgĩtwarwo bũrũri wa Misiri
ũguucĩtio na icũhĩ cia maniũrũ.

5 ^d“ ‘Na rĩrĩa nyina ya mũrũũthi ũcio yoonire mwĩhoko wayo ndũnahinga,
na itanya rĩayo nĩrĩatuĩka rĩa tũhũ-rĩ,
ĩkĩoya kĩana kĩngĩ kĩayo,
ĩgĩgĩtua mũrũũthi ũrĩ hinya.
6 Naguo ũgĩcangacanga gatagatĩ ka mĩrũũthi ĩrĩa ĩngĩ,
nĩgũkorwo nĩwatuĩkĩte mũrũũthi ũrĩ hinya.
Mũrũũthi ũcio ũkĩmenyera gũtambuuranga kĩrĩa wanyiita,
na ũkarĩĩaga andũ.
7 Nĩwamomorire ciĩhitho ciao iria nũmu,
na ũkĩananga matũũra mao.
Bũrũri ũcio na andũ arĩa othe maatũũraga kuo,
makĩiyũrwo nĩ guoya wa mũraramo waguo.
8 ^eHĩndĩ ĩyo, ndũrĩrĩ ikĩũũkĩrĩra,
ndũrĩrĩ iria cioimĩte ngʼongo iria ciagũthiũrũrũkĩirie.
Ikĩwambĩra mũtego,
naguo mũrũũthi ũcio ũkĩgwatĩrio irima-inĩ rĩao.
9 ^fMakĩũguucũrũria na icũhĩ cia maniũrũ, makĩũingĩria kĩaga-ini,
makĩũtwarĩra mũthamaki wa Babuloni.
Makĩũikia njeera,
na nĩ ũndũ ũcio mũraramo waguo ndwacookire kũiguuo
kũu irĩma-inĩ cia Isiraeli rĩngĩ.

10 ^g“ ‘Maitũguo aatariĩ ta mũthabibũ
ũhaandĩtwo thĩinĩ wa mũgũnda waku wa mĩthabibũ
hakuhĩ na maaĩ;
nĩwaciarĩte mũno, na ũkagĩa na honge nyingĩ
tondũ wa maaĩ kũingĩha.
11 Honge ciaguo ciarĩ hinya,
igakĩagĩrĩra gũtuuo mũthĩgi wa mũthamaki.
Mũthabibũ ũcio ũkĩraiha na igũrũ,
ũgĩkĩra mahuti marĩa matumanu,
na nĩwonekaga wega nĩ ũndũ wa ũrĩa waraihĩte na igũrũ,
na nĩ ũndũ wa honge ciaguo nyingĩ.
12 ^hNo nĩwamunyirwo na mĩri yaguo nĩ ũndũ wa marakara,
na ũgĩikanio thĩ.
Naruo rũhuho rũrĩa ruumaga mwena wa irathĩro rũgĩtũma ũhoohe,
na maciaro maguo makĩhũrũrwo;
honge ciaguo iria ciarĩ hinya ikĩũma,
ikĩhĩa nĩ mwaki, ũgĩciniina.
13 Na rĩrĩ, rĩu ũhaandĩtwo werũ-inĩ wa mũthanga,
bũrũri ũrĩa mũũmũ, ũrĩ nyoota.
14 ⁱMwaki woimire rũhonge-inĩ rũmwe rwa iria nene,
ũgĩcina maciaro maguo, magĩthira.
Gũtirĩ rũhonge rũrĩ hinya rũtigaire harĩ guo
rũngĩtuuo mũthĩgi wa mũthamaki.’
Maya nĩ macakaya, na nĩmo maũndũ marĩa marĩcakayanagĩrwo namo.”